මේ සූත්රය ඛුද්දක නිකායේ-ඛුද්දකපාඨ පාළි- අභිවුර්ධිය සලසා ගැනීමට අවශ්ය දෙවියන්ට සහ මිනිසුන්ට, ඒ සඳහා පිළිපැදිය යුතු උතුම් කරුණු පෙන්වා දෙමින් සිදුකල අනුශාසනාව ඇතුලත් සූත්රය බව සිහි තබාගන්න.
එවං මෙ සුතං
එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්සආරාමෙ. අථ ඛො අඤ්ඤතරා දෙවතා අභික්කන්තාය රත්තියා
අභික්කන්තවණ්ණා කෙවලකප්පං ජෙතවනං ඔභාසෙත්වා යෙන
භගවා තෙනුපසඬකමි,
උපසඬකමිත්වා භගවන්තං අභිවාදෙත්වා එකමන්තං අට්ඨාසි, එකමන්තං ඨිතා ඛො සා දෙවතා භගවන්තං ගාථාය අජ්ඣභාසි.
“බහූ දෙවා මනුස්සා ච, මඬගලානි අචින්තයුං-
ආකඬඛමානා සොත්ථානං, බ්රෑහි මංගලමුත්තමං”
“අසෙවනා ච බාලානං, පණ්ඩිතානඤ්ච සෙවනා-
පූජා ච පූජනීයානං, එතං මංගලමුත්තමං”
“පතිරූපදෙසවාසො ච, පුබ්බෙ ච කතපුඤ්ඤතා-
අත්තසම්මාපණීධී ච, එතං මංගලමුත්තමං”
“බාහුසච්චඤ්ච සිප්පඤ්ච, විනයො ච සුසික්ඛිතො-
සුභාසිතා ච යා වාචා, එතං මංගලමුත්තමං”
“මාතාපිතු උපට්ඨානං, පුත්තදාරස්ස සඞ්ගහො-
අනාකුලා ච කම්මන්තා, එතං මංගලමුත්තමං”
“දානඤ්ච ධම්මචරියා ච, ඤාතකානඤ්ච සඞ්ගහො-
අනවජ්ජානි කම්මානි, එතං මංගලමුත්තමං”
“ආරතී විරතී පාපා, මජ්ජපානා ච සංයමො-
අප්පමාදො ච ධම්මෙසු, එතං මංගලමුත්තමං”
“ගාරවො ච නිවාතො ච, සන්තුට්ඨි ච කතඤ්ඤුතා-
කාලෙන ධම්ම සවණං, එතං මංගලමුත්තමං”
“ඛන්තී ච සොවචස්සතා, සමණානඤ්ච දස්සනං-
කාලෙන ධම්මසාකච්ඡා, එතං මංගලමුත්තමං”
“තපො ච බ්රහ්මචරියඤ්ච, අරියසච්චාන දස්සනං-
නිබ්බානසච්ඡිකිරියා ච, එතං මංගලමුත්තමං”
“ඵුට්ඨස්ස ලොකධම්මෙහි, චිත්තං යස්ස න කම්පති-
අසොකං විරජං ඛෙමං, එතං මංගලමුත්තමං
“එතාදිසානි කත්වාන, සබ්බත්ථමපරාජිතා,
සබ්බත්ථ සොත්ථිං ගච්ඡන්ති, තං තෙසං මංගලමුත්තමං”ති.
Aaryasathya 