අති පූජණීය පිරිත් පොත් වහන්සේ සම්පාදනය කළේ බුදු දහම ගැන අබමල් රේණුවක තරම් වත් අවබෝධයක් නැති ඕනෑම කෙනෙකුට බුදුන් වදාළ ඒ සත්ය ධර්මය කුමක්දැයි නිවැරදිව අනුපිලිවෙලට දැනගනිමින් අවබෝධය ලබාගෙන අවසානයේ සතිපට්ඨාන භාවනාව ප්රායෝගිකව පුහුණු වෙමින් ධර්ම අවබෝධය සාක්ෂාත් කරගැනීම සඳහා අවශ්ය මාර්ගය පෙන්වීමටයි.
පටුන
බුදුන් වහන්සේ විසින් දේශනා කල ධර්මය කුමක්දැයි නිවැරදිව දැනගැනීමටත්, බුද්ධ ශ්රාවකයෙකු බවට පත්වීමටත්, නිවණ දැකීමටත්, නිවණ සාක්ෂාත් කරගැනීමටත් අවශ්ය කරන සියලුම ධර්මයන් ඇතුලත් වන අයුරින් තෝරාගත් සුත්ර 37 ක්ද, සතිපට්ඨාන භාවනාවද, මා විසින් මේ පොත තුල පෙළගස්වා තිබෙන පිළිවෙල අනුව ඔබ මුලින්ම පිවිසිය යුත්තේ ධම්ම චක්ක පවත්තන සුත්රයටයි. එය කියවා ඒ පිටුව අවසානයේ ඔබගේ දකුණු අත පැත්තේ ඇති ඊතලය මගින් ඊළඟ සච්ච විභංග සුත්රයට පිවිසිය හැක. මෙලෙස සතිපට්ඨාන සුත්රය දක්වා අනුපිලිවෙලට කියවමින් නුවණින් අවබෝධ කරගැනීමට උත්සාහ කරන ඕනෑම කෙනෙකුට බුදුන් වහන්සේගේ ශ්රාවකයෙක් වීමට හැකි බව ඒකාන්ත සත්යයකි. ඒ සඳහා දක්ෂ වීමට නම්, ස්ථිර වූ අරමුණෙහි සිත පිහිටුවාගෙන, ඒ අරමුණෙහි සිත කීකරුව තබා ගත හැකි, තවද දැඩි දෘෂ්ඨි ගත නොවන, තමා පිලිබඳ හීන හෝ අධි මානයක් නැති කෙනෙකු විය යුතුයි.
අපගේ පරමාර්ථය වන්නේ එක් පින්වතෙකුට හෝ බුදුන් වහන්සේගේ ධර්මය නිවැරදිව අවබෝධ කරගැනීමට සැලැස්වීම මිස
අපගේ දැනුම පෙන්වීම හෝ කිසිවකුට තවත් දැනුමක් පමණක් ලබා දීම නොවේ.
ඒ නිසා මීට පරිබාහිරව මේ පොතට අලුතින් සූත්ර එකතු කිරීමට බලාපොරොතු නොවන බව සලකන්න.
Aaryasathya 